吳若希節目上重溫16年前青澀片段感觸落淚 剖白24歲遇家庭巨變被迫成長

吳若希（Jinny）噚晚喺TVB旅遊節目《他們的澳洲駕期》上重溫16年前出道初期的唱歌片段，感觸良多。

節目中，製作組播出Jinny當年青澀片段，佢坦言當年性格非常驚青，對外界要求幾乎千依百順。見到昔日的自己，Jinny顯得感觸良多，期間一度落淚。

Jinny憶述：「嗰段時間我阿媽入咗醫院，加埋好多嘢發生，我唔expect 24歲就已經要經歷，將一個懵懂嘅自己逼住變成一個要獨當一面嘅人，我需要去hold起成頭家。」

節目入面，Jinny與戴祖儀（Joey）大談知心好友嘅契機。Joey分享：「好難搵到一個笑聲完全一樣嘅。」Jinny就話Joey係佢的開心果：「永遠我好唔開心嘅時候，你會搵到你嘅方法切入去睇件事，你負責將快樂灌入我個腦。」

談及被Hater批評，Joey就話豁然表示：「因為鍾意你的人一定多過討厭你的人」、「因為睇一個人嘅缺點永遠容易過睇一個人嘅優點」。

《他們的澳洲駕期》今晚（27日）播出最後一集，三位主持將大談各自的Bucket List。